Pass la Crusch – Il Rizli

Il Pass la Crusch, il Rizli, il Krüzli ni il Chrüzli
pdfPass la Crusch

004Tschien onns ustria ni hotel Krüzli han motivau il Forum cultural Tujetsch ed igl ustier Curdin Brugger da tschentar ina crusch sigl ault dil Pass la Crusch. Il pass ha sia historia; quella davon tschentaners ei forsa stada pli impurtonta ed interessanta che quella dad oz! Dapli ella suandonta emprova da precisar empau la veta dil pass.

Persunalmein entaupel jeu sco buobet il num Krüzli cull’ustria dil Krüzli a Gonda/Sedrun, buca cun ir ell’ustria, per gliez muncavan a nus ils raps, na sulettamein cun udir quei num empau exotic en mias ureglias affonilas. Igl onn 1960 sundel, ensemen cun miu cusrin, paster da casa dil vischinadi da Gonda a Valtgeva. Dis caulds mavan nus da vart seniastra dalla Val Strem en. Nus entupavan lu savens turists e tursitas che mavan e vegnevan sul pass. Nus savevan buca capir206 che glieud sappi far da quels strapazs da talas caliras cu nus murevan quasi dalla calira e pudevan strusch semuentar en da quellas temperaturas. Il medem onn hai jeu era spitgau sin la fin dil mund. Ei veva giu num da gie ir sisum ina plaunca, ni sin la pezza – lu mondi tut pli spert. Jeu creiel da seregurdar, tard suentermiezdi vess ei giu da succeder. Nuot ei schabegiau e nus buobs essan stai trumpai e currai da crer da quellas caussas. En scola vein nus lu empriu per dadretg ch’il Krüzlipass, meglier detg ch’il Pass la Crusch mondi naven da Sedrun ad Amsteg. L’emprema e suletta gada hai jeu ascendiu il Pass la Crusch ils 22 da fenadur 1994 e quei cun mes fegls naven da Sedrun entochen ad Amsteg.

Il num
Gia el temps miez steva ina crusch sil pass quei che argumentescha era siu num. Pader Placi a Spescha scriva Hrizli. La carta geografica, l’emprema dalla Surselva, da 1857, porta il num Kreuzlipass. Oz ei en diever Chrüzlipass sillas cartas ufficialas, denton fetg currenta ei era la scripziun Krüzlipass. Il num romontsch Pass la Crusch ei grev d’eruir dapi cu ch’el ei vegnius en diever; ils Tuatschins han pil pli duvrau il num tudestg e las scartiras dil 19avel tschentaner nodan pil pass cun il num Rizli.

Historia
Il traffic regulau sul Gottard pren sia entschatta cun l’avertura dalla Val Scalina, cun l’erecziun dalla Punt dil Giavel. Quei ei succediu per l’entschatta dil 13avel tschentaner; lu cu ins ha construiu en Tujetsch il clutger e la baselgia da sogn Vigeli, carteivel l’emprema baselgia ed a Dieni ei il casti vegnius construius silla collina glaciala a Putnengia. Vulevan ins avon serender digl Uri el Tessin stueva vegnir duvrau ina via ch’untgeva la Val Scalina. Ina pusseivladad fuva quella sul Bäzberg a Hospental. In’autra via fuva quella da Caschinutta sulla Riental e Nätschen ad Andermatt. La tiarza varianta menava dad Amsteg sul Pass la Crusch a Sedrun, vinavon a Mustér, ni sur Stagias e sul Pass Lucmagn. Ils meinis dils historiografs ein differents e contradictorics. Per ins giugava il pass ina fetg impurtonta rolla avon l’avertura dil Gottard, pils auters ha el adina mo giu muntada locala. In’egliada silla carta geografica muossa ualti spert ils avantatgs dil pass. Daco han ils marcadonts e pelegrins, sin lur viadi viers il sid, buca fatg diever dil pass enstagl da prender la via bia pli liunga sur Cuera?
208Aschilunsch sin emprema egliada in pass, ina varianta, sco via traversala viers ils sid, denton strusch ni gnanc pusseivla da cumprovar. Deplorablamein dat ei indecis da mussaments dil pass fetg tard. Emprems documents dateschan dall’entschatta dil 17avel tschentaner. Duront l’uiara da trenta onns noda igl Uri e Zug sur da truppas postadas sils pass Alpsu e La Crusch. Sin cartas che portan il num stuein nus spitgar ditg. Per l’emprema gada eisi nudau sin duas cartas da Zug da 1685 e 1698 in pass el vest da Trun cul num „Creuz“. Era il num sez tradescha nuot dalla vegliadetgna da quel. Gia el temps miez anflan ins sigl ault da pass savens ina crusch da lenn sco engraziament a Diu pil stentus e prigulus viadi sul cuolm. Era ch’in vegl num romontsch ei buca enconuschents pil pass, lai sminar d’in passadi buca ton impurtonts ed enconuschents, auter che local. Fuss il pass vegnius duvraus fetg stedi dil temps dalla fluriziun dil traffic sul Lucmagn, vess el segiramein survegniu in num romontsch entras ils habitonts. En egl croda era il possess dalla claustra da Mustér suenter il Lucmagn ed il Pass Alpsu, denton buca al pei dil Pass la Crusch. Quei lai senza dubi giudicar, ch’il Ritzli hagi mai giu l’impurtonza d’auters pass ella regiun dil Gottard. Silpli ha el surviu sco impurtont passadi pils Tuatschins ed ils Uranès gest da l’auter maun dil pass, ella Val digl Etzli e Val Maderana.

Disgrazias ed eveniments
1794
Ils 28 da zercladur 1794 ein las duas soras Onna Maria Berther, dunna da Gion Battesta de Pelly e la giuvna Maria Culastia Berther, returnond dad in pelegrinadi a Nossadunnaun, mortas dalla stauncladad e ferdaglia ella Val Strem.

1799
Ils 24 da settember 1799 marschan da Sedrun anora 2400 schuldada austriaca sul pass. General Auffenberg meina sia schuldada sul „tief beschneite und wilde Kreuzli“ ad Amsteg. Sil Plaun digl Etzli ha la schuldada campau ina notg, quei en tutta ferdaglia e pulitamein mudergiada dil strapaz e stauncladad. L’auter di, suenter Bristen, sto la schuldada nunspitgadamein cumbatter encunter la truppa franzosa. Tschun entiras uras han ils cumbats cuzzau. Suenter che Auffenberg ei vegnius dominè e finalmein saviu rumper atras eis el danovamein secunfruntaus ad Amsteg encunter schuldada franzosa avon che finalmein arrivar ella Val dalla Reuss.

1834
La cronica raquenta d’in Josef Maria Lussmann da Silenen ed in cert Gion Battesta Berther che seigien schelai sin viadi sul Krüzli.

1898
La Gasetta Romontscha dils 18 d’uost 1898 porta il suandont rapport: „La sonda sera ha il cavrer da Sedrun notificau alla suprastonza da Tujetsch, ch’ei sesanfli entadem la Val Strem, in toc sut igl ault dil Kreuzlipass giu, sper il trutg, il cadaver d’in um, il qual ei sin immediata expertisa seconstatau. Il medem temps ein era gia dus amitgs ed il quinau da quei disgraziau vegni sur tal pass per encurir fastitgs da quel, essend ch’el havess schon dapi 4 – 5 dis puspei duiu esser turnaus anavos a casa, haveva giu dau negin rapport e ch’ins saveva da sia projectada rutta. Era fuvan tuttas retschercas telegraficas stadas senza success. Il disgraziau fuva in cert Albert Müller da 36 onns, oriunds dil Turgau ed emploiau a Turitg sil biro da controlla dalla Nordostbahn. Sin sia bara, che sesanflava en posiziun durmenta, sper la senda, han ins anflau ses daners, proviant e siu diari tut en uorden. Tenor il davos fuv’el serendius gia la dumengia avon allas 4 dalla damaun naven d’Amsteg e fuv’arrivaus pér las 5 dalla sera tiella crusch dil Kreuzlipass, pia pér en 13 uras, ferton che quei viadi selai far en 5 – 6 uras. Entochen leu havevan cavrers uranès mussau ad el la via. Da quell’ura naven cala siu diari si, schegie ch’ins ha anflau sia S200bara in toc sut igl ault dil pass giu. Ad Amsteg havevan ins advertiu igl um giuven da buc ir sul Kreuzlipass ni silmeins buca senza guid, buca perquei che quei pass fuss grevs ni malsegirs, schegie da vart uranèsa ensi empau strapazius, mo plitost perquei, ch’il disgraziau Müller fuva da fetg fleivla constituziun ed havev’aunc combas mendusas. Ei fuva perquei fetg temerari d’in tal um da serender sur in cuolm e lu aunc persuls. Sco ils cavrers uranès raquentan, stuevi Müller tier scadina pendenza empau pli ferma seruschnar sin tuts quater, che vegn era confirmau tras il visum repertum medicinal. Tenor quel ha ei plinavon seschau constatar negins particulars indecis dalla caschun dalla mort da Müller, aschia ch’igl ei ord tut dubi, che quel seigi da fleivlezia buca serebitschaus vinavon e hagi stuiu suttacumber al strapaz a mesa via. Era eis ei da supponer, che quei pupratsch hagi aunc stuiu surviver si en quels aults la stravaganta notg da neiv e dracca dils 8 sils 9, che havess purtau la mort al pli ferm um en tala situaziun. La bara ei vegnida transportada ils 16 da quest a Turitg. La communicaziun dalla Neue Zürcher Zeitung, ch’il cadaver da Müller fuvi tut smuttaus ei faulsa, essend ch’el purtava neginas blessuras e fuva buca ruclaus.“

1913
Igl onn 1913, il 13 da zercladur sesaulza da Berna in aviun cul pilot Oskar Bider (1891-1919). El traversa las Alps e setschenta a Milaun. Suenter 13 dis retuorna el sul Pass Lucmagn, Pass la Crusch anavos en Svizra. El ei staus igl empren carstgaun che ha travesrau las Alps en omisduas direcziuns. Plinavon ha el considerablamein priu part all’organsiaziun dils emprems aviuns d’armada per la Svizra duront l’emprema uiara mundiala.

Il viadi da pader Placi a Spescha igl onn 1812
Pader Placi a Spescha ha surmuntau il pass igl october 1812. Gliez onn fuva el senza lubientscha ufficiala caplon a Sedrun. Nus enconuschin el sco in um appreziau enviers la Val Tujetsch. Cun sia descripziun dalla val ha ella demussau dapli che simpatia per Tujetsch. Nus enconuschin el sco alpinist, mineralog e viandont-perscrutader. El ha dessignau numerusas cartas geograficas da nossa cuntrada. Inaga dapli eis el semess gl’atun 1812 sin viadi, sia finamira fuva Nossadunnaun, pia in tipic pelegrinadi, cumbinaus cun las enconuschentas „fleivlezias“ dil pader, che vegneva fatgs sul Pass la Crusch. En sia introducziun noda el: Ei vala la peina d’emprender d’enconuscher quellas vals alpinas, pertgei ch’ellas ein ton atgnas ella natira en cumparegliaziun cun autras. Gie, las midadas apartias, la crappa e greppa, ils cuolms aults, ils glatschers imposants e las bellezia cascadas ch’ins entaupa ein dapli ch’en autras valladas.
209Da Sedrun ni da Camischolas meina la senda sul Pass la Crusch. Ins ascenda u dalla vart dretga ni seniastra dalla Val Strem. El temps da 1 ½ uras contonsch’ins la planira dalla val. Silla vart encunter vest dalla val sesanfla in trutg che meina mes’ura dalla val en e lu mes’ura dalla costa dretga siado. Lu arriv’ins sigl ault dil pass, nua che pli baul esanflava ina crusch da lenna che marcava il cunfin e deva il num dalla cuntrada. Sin quei tschancun han ins adina en vesta il Péz Tgietschen. El cumpara magnificamein en siu contuorn.
La Val digl Etzli meina in’ura encunter vest ed il vallet ei emplenius totalmein cun crappa. Dalla costa viers nord flessegian dus dutgets che svaneschan ella crappa e vegnan alla glisch per alla fin da quella valetta. Ins sto seproveder cun aua sigl ault dil cuolm, schiglioc vegn ins mudergiaus dalla seit. Avon ins cumpara la val en sia entira lunghezia. Dretg sesaulza il Bristenstock e seniester il pli ault Crispalten cun siu glatscher che penda dalla costa giu. Spescha manegia cheu negin auter péz, ch’il Péz Giuv.
Il trutg tras la val ei fetg selvadis e prigulus, oravontut lu cu ins fa il viadi, cu ei ha leu negina neiv dira. Ins po far il viadi dretg ni seniester, ni enamiez, denton il viadi ei carpus e beinduras ei il trutg nunveseivels. Jeu hai quasi duvrau in’ura per arrivar el funs dalla val. Alla fin cuora l’aua ord crappa da granit e gneis. Cheu entscheivan era a012 crescher las empremas caglias alpinas. Aunc in bien quartura ed il center da treis vals ei contonschius: la Spielauer, da seniester, la Val digl Etzli e valletta dil Pass la Crusch, da dretg. Cun la „cavorgia“ Mila, encunter la Mittelplatte, che stat cuntraria alla Val digl Etzli, e meina a Rueras ella Val Tujetsch, fuorman quellas direcziuns ina crusch ch’ha dau il num a quei cuolm e pass.
Cheu secatta ina planira pleina da fontaunas. Ils dutgs seuneschan e fuorman il dutg dalla Val d’Etzli. Ins traversa quei dutg ed arriva tier ina tegia d’alp. Da leu semein’ins viers nord per serender dalla vart seniastra dalla val giuado. Gest alla fin dall’emprema planira surves’ins l’entira Val digl Etzli en sia entira lunghezia.

Pelegrinadis e fieras
Naven dil pass giuviars encunter la Val digl Etzli ei il passadi nundetg carpus e grevs da traversar cun biestgam. Tuttina ei meinsvart vegniu catschau biestga sul pass. Pil pli fuvan els quasi sfurzai da purtar per tschancuns ils animals. Pli sempel eisi stau cun tiers manedels ni purschals. Cauras e nuorsas ein bein disadas trottar sin da quels trutgs. Ils purschals vegnevan pil pli purtai alla fiera. Il cudischet da Norbert Berther, „Hanletg sur il cuolm d’Ursera“, paleisa suandontamein sur la historia dil hanletg suls pass tuatschins: Tenor indicaziuns dil historicher local, Gion Antoni Venzin, Rueras (1896-1962), ha il hanletg da purschals entschiet entuorn 1880. El ha cuzzau entochen els 1940. Sur il Rizli vegneva ei era purtau purschals ina ga ni l’autra, denton il bia da privats e buca da marcadonts. Era Uranès vegnevan enqualga sur quei pass per cumprar da quella rauba.

Pli sempel vevan ils pelegrins e pelegrinas da Nossadunnaun ord la Val Tujetsch e contuorn. Enstagl d’ascender il Pass Alpsu e percuorer la Val Scalina prendevan ei la via pli cuorta e direct sul Pass la Crusch giu ella Val dalla Reuss e da leu a Nossadunnaun. Anavos vegneva duvrada la medema via. Sigl ault pass ein mantuns da crappa. Ein quei crappa duvrada purtada si per far 013empau penetenzia e lu deponida en mantuns sil pass?
Documentau ei era che beinenqual pelegrin ni pelegrina che han passau il pass ils 10 da fenadur per serender a Mustér per l’auter di festivar la fiasta da s.Placi per retscheiver e gudignar in perdun. Pli baul fuva la fiasta era accumpignada cun ina fiera da rauba ellas streglias dil vitg da Mustér.

Via sogn Giachen
La via da sogn Giachen meina dalla Val Müstair sur Scuol ell’Engiadina Bassa, sur il Pass Scaletta e Strela a Cuera. 021Da leu dalla Surselva siado e da Sedrun sul Pass la Crusch ad Amsteg. Ella Svizra Interna s’unescha ella lu cun la via da sogn Giachen svizra. Agl ur dalla senda sigl ault dil pass indichescha ina plachetta cun ina conchiglia, il simbol dils pelegrins da s. Giachen, la via da sogn Giachen che finescha a Santiago de Compostela en Spagna. – En Val Strem, gest avon ils Bauns da vart seniastra, sesanfla la Plaunca sogn Giachen. Ha quella da far enzatgei cun la Via sogn Giachen?

Il lexicon historic dalla Svizra presenta il pass taluisa:
Passadi d’ina altezia da 2347 m che colligia Tujetsch cun la Val Maderana e la val uranèsa dalla Reuss. Dil temps da Hallstatt menava probabel ina via da Biasca sul Lucmagn ed il Pass la Crusch en la Val dalla Reuss.Tochen el temps mediaval tardiv ha quei pass giu la medema impurtonza sco il Cuolm d’Ursera, Alpsu. El vegneva duvraus stediamein dils Tuatschins pil commerci d’animals manedels cun la Svizra Interna e quei oravontut cun purschals. Ils 24 da settember 1799 ei il general austriac Affenberg s’avanzaus da Mustér sul Pass la Crusch en la Val Maderana nua ch’el ei fruntaus cun ils Franzos. Entochen all’entschatta dil 20avel tschentaner han ins duvrau il pass era per pelegrinar a Nossadunnaun. Oz ha il Pass la Crusch mo aunc in’impurtonza turistica marginala.

Per finir
Mai ei vegniu ponderau da baghegiar ina via sul pass. Tonaton ei la muntada carteivlamein stada015 pli gronda els tschentaners vargai. La via per arrrivar egl Uri fuva pils Tuatschins cuorta e quei ha meinsvart giu ses avantatgs. Oz ei il pass in attractiv pass alpin, cun ina cuntrada selvadia e tuttina magnifica. La vesta sin nies pli ault pez, il Pez Tgietschen (3328 m.s.m.) ei imposanta ed impressiunonta. La Val Strem, oravontut ell’alp, ei d’ina biala planira cun in Rein da Strem che flessegia en tutta ruasseivladad avon che semetter en fraccass suls Bauns giu e dalla val viado. Dalla vart uranèsa ei il pass oravontut all’entschatta fetg selvadis. Naven dil funs dalla val suondan plauns e lu tessaglias e quei en pliras etappas avon che finalmein arrivar a Bristen. Da leu maunca ei buca ton bia ed ins ei ad Amsteg. Turists e turistas, amitgs dallas muntognas apprezieschan il viandar sur quei pass. El porscha vera cuntrada alpina!

Fontaunas
Verkehrswege in Uri, Surenen, Chinzig Chulm und Krüzlipass, Raststättegesellschaft N2 Uri AG, 1999
Pater Placidus a Spescha, Sein Leben und seine Schriften, 1913, Hager/Pieth
Geschichtliches über den Chrüzlipass; www.top-of-uri.ch
Lexicon historic dalla Svizzer, Adolf Collenberg
Cudisch da Tujetsch, 1987, plirs auturs

La tschentada dalla crusch
Ils 12 d’october 2014 ha giu liug la tschentada dalla crusch sigl ault dil pass. Medemamein ei era ina conchiglia, simbol da sogn Giachen, vegnida plazzada il medem di agl ura dil trutg. Ver diesch persunas ein stadas presentas. Dil reminent eis ei era stau ina sentupada denter Uri e Grischun damai ch’ils responsabels dalla tegia digl Etzli han era priu part a quei act historic. La crusch, simbol da nossa religiun, duei ussa accumpignar ils viandonts sul pass e regurdar al Scaffider ch’ha creau tonta bellezia alpina.

Ella pressa:
La Quotidiana – 4-11-2014 Frontispezi
La Quotidiana – 4-11-2014 Text

Gruppa

Da seniester: Norbert Berther, Luregn Derungs, Lezi Brugger, Curdin Brugger, Tarcisi Hendry, Reto Bearth, Monica Bearth, Doris e René Bättig, Ursin Giger, buca silla foto Tumaisch Valier